Tzitade de su Cabu

Artìculu in LSC

Panorama

Posidura in sa provìntzia de su Cabu Otzidentale

Tzitade de su Cabu (in afrikaans Kaapstad, in xhosa iKapa, in inglesu 'Cape Town) est sa capitale legislativa de su Sudàfrica e cun unos 3,5 milliones de bividores sa de tres tzitades prus populadas de s'istadu. Amministrativamente fàghet parte de sa provìntzia de su Cabu Otzidentale, de chi est cabulogu. Su tzentru s'agatat a s'estremidade setentrionale de sa penìsula de su Cabu, unos 47 km a norte de su cabu de Bonu Isperu.

Fundada in su 1652, Tzitade de su Cabu est istada su primu aposentamentu europeu de Sudàfrica; dae inoghe su nomìngiu de tzitade mama. Capitale de sa colònia de su Cabu in antis (1652-1910) e cabulogu de sa provìntzia de su Cabu a pustis de (1910-1994), totu s'istòria de su Sudàfrica modernu, de s'istòricu isbarcu de sos primos colonos olandesos a su primu discursu de Nelson Mandela de s'era post-apartheid at inoghe lassadu rastas culturales e architetònicas indelèbiles. Antigos edifìtzios in istile coloniale olandesu de su Cabu e de època vitoriana coesistent cun modernos ratachelos e giardinos botànicos froridos.

Tzitade de su Cabu est dotada de un'aeroportu internatzionale e si podet cunsiderare sa capitale turistica de su Sudàfrica. Sos numerosos bisitatores sunt atràidos siat de sa tzitade in sese siat de sas bellesas naturalìsticas de sa Penìsula de su Cabu; medas giros de su Paisu partint dae inoghe, imbouchende a fatu sas famadas Wine Route e Garden Route, dirighende·si cara a su Karoo, su Boland o sa costa meridionale.